"Брестское областное кадетское училище"

У перыяд з 26 лютага па 2 сакавіка ў Брэсцкім абласным кадэцкім вучылішчы прайшоў Тыдзень беларускай мовы і літаратуры. З першага дня ўсе навучэнцы і педагогі ўключыліся ў правядзенне акцыі “Рускай мове дай разгрузку- размаўляй па-беларуску”, падчас якой усе школьныя прадметы выкладаліся на беларукай мове. Кожны вучэбны ўзвод выпусціў насценгазету “Зямля пад белымі крыламі”, у якой вучні выказвалі свае цёплыя пачуцці да нашай роднай Беларусі. На першым паверсе была арганізавана кніжная выстава “Чытаем па-беларуску”, на якой былі прадстаўлены, як добра вядомыя кнігі, так і навінкі беларускага кнігавыдавецтва.

На другі дзень фае першага паверха напоўнілася чароўнымі гукамі беларускіх песень, а ўсе жадаючыя змаглі прыняць удзел у музычнай віктарыне. Пасля абеду кадэты былі запрошаны ў беларускі відэасалон. Яго арганізаваў кадэт 33 узвода Бойка Данііл. Ён прапанаваў для прагляду дакументальныя і мультыплікацыйныя фільмы на беларускай мове, а таксама расказаў гісторыі іх стварэння.

Серада была прысвечана вуснай народнай творчасці. Кадэт 32 узвода Вольф Данііл загадваў загадкі, адгадаўшы якія можна было атрымаць у якасці ўзнагароды смачную адгадку: агурок, бурак, арэхі, цыбулю, часнык, моркву, грыбы. Ярмак Кірыл і Тачоны Віталій запрасілі вучняў на гульню “Прымаўкі і прыказкі – роднай мовы прывязкі”. А пасля ўрокаў усе, хто хацеў, маглі наведаць майстар-клас па беларускіх гульнях і танцах, які падрыхтавалі кадэты 21 узвода Цібец Юлія, Зубрык Насця, Фацеева Дар’я, Шолохаў Кірыл і Драгун Арцём.

Інтэлектуальны чацвер прапанаваў кадэтам прыняць удзел у літаратурных віктарынах “Паэма “Новая зямля” Якуба Коласа”, “Творчасць Аркадзя Куляшова”, “Гонар Беларусі”, у гульні “Пяць зорак”, разгадаць крыжаванкі “Творчасць Дуніна-Марцінкевіча”, “Аповесць Васіля Быкава “Знак бяды”, а таксама выканаць “Творчыя заданні для цікаўных”.

Завяршыўся тыдзень беларускай мовы і літаратуры “Літаратурным брэйн-рынгам” для дасведчаных старшакласнікаў. У гульні, якая адбылася ў актавай зале, прынялі ўдзел дзве каманты: “Рунь” (11-я класы) і “Вясёлка” (10-я класы). Падчас гульні кадэты адказвалі на пытанні па беларускай літаратуры. Найбольшую цікавасцьвыклікалі пытанні ў чорнай скрыні. Тыя, хто з імі справіўся, атрымалі ў якасці ўзнагароды сала, хлеб і яйкі. Самымі цяжкімі для каманд былі пытанні бліц-турніраў. На жаль, каманды не з усімі імі справіліся. Парадавалі гледачоў і змаглі прынесці камандам па 5 балаў Тачоны Віталій, Басік Насця і Гаргун Насця. Яны выступілі са сцэны з байкай “Дыпламаваны баран” Кандрата Крапівы, вершамі “Бацьку” і “Трэба дома бываць часцей” Рыгора Барадуліна. Кандратовіч Юля, Рудовіч Кацярына, Івашкевіч Ілья, Чабатарэнка Сяргей парадавалі гледачоў прыгожымі песнямі “Дзеванька-вясна” і “Бацькаўшчына”. Сярод балельшчыкаў трэба адзначыць Кульжыка Уладзіслава, які атрымаў прызы за правільныя адказы ў гульні з гледачамі “Сем падказак”. У выніку гульні “Літаратурны брэйн-рынг” перамагла каманда “Вясёлка”.

На працягу тыдня ў вучылішчы панавала атмасфера любові, пяшчоты і захаплення беларускай культурай, мовай, літаратурай. Кадэты з задавальненнем удзельнічалі ва ўсіх мерапрыемствах і праводзілі іх. Пажадаем вучням і настаўнікам і надалей не траціць сувязяў са сваім родным краем, з роднай зямлёй, не забываць родную мову.